බන්ධනාගාර තුළ පවතින අධික තදබදයට විසඳුමක් ලෙස සැකකරුවන් රිමාන්ඩ් බන්ධනාගාරගත නොකර “නිවාස අඩස්සියේ” තැබීමේ නව නීතිමය ක්රමවේදයක් හඳුන්වා දීමට රජය සූදානම් වන බව හර්ෂණ නානායක්කාර අමාත්යවරයා ප්රකාශ කළේය.
පෙබරවාරි 19 දින පැවති මාධ්ය හමුවකදී අදහස් දක්වමින් ඔහු සඳහන් කළේ, මේ සම්බන්ධ නව පනතක් සකස් කිරීම සඳහා යසන්ත කෝදාගොඩ ඇතුළු විශේෂඥයන් සමඟ කටයුතු කරමින් සිටින බවයි.
“10,000කට හදපු හිරගෙදර 39,000ක්”
අමාත්යවරයා ඉදිරිපත් කළ දත්ත අනුව, මෙරට බන්ධනාගාර පද්ධතිය නිර්මාණය කර ඇත්තේ වික්ටෝරියානු යුගයේදී සිරකරුවන් 10,500කට පමණ ඉඩ සලසමින්ය.
එහෙත් වර්තමානය වන විට බන්ධනාගාරවල සිරකරුවන් 39,000ක් පමණ රඳවා සිටින අතර, එයින් 28,000කට ආසන්න පිරිසක් රිමාන්ඩ් සිරකරුවන් බව ද ඔහු හෙළි කළේය.
“අපට ගැටලුව වෙලා තියෙන්නේ වැරදිකරුවන් 10,000 නෙමෙයි. රිමාන්ඩ් සිරකරුවන් විශාල සංඛ්යාවයි,” යැයි අමාත්යවරයා පැවසීය.
නිවාස අඩස්සිය ක්රියාත්මක වන්නේ කෙසේද?
නව යෝජිත පනත යටතේ,
- සැකකරුවන් බන්ධනාගාරගත කිරීම වෙනුවට
- නිවාස අඩස්සියේ තැබීම
- විද්යුත් නිරීක්ෂණ (Electronic Monitoring) ක්රමවේදයක් යටතේ
පාලනය කිරීම සිදු කෙරේ.
මෙහිදී සැකකරුවන්ගේ ගමන් සීමා, නීති උල්ලංඝනය කිරීම, සහ ඇප කොන්දේසි පිළිපැදීම විද්යුත් උපකරණ මගින් නිරීක්ෂණය කිරීමට සැලසුම් කර ඇත.
“හිරේ ඇතුළේ ඉන්නවා වෙනුවට ගෙදර ඇතුළට වෙලා ඉන්න පුළුවන් ක්රමයක්,” යැයි අමාත්යවරයා පැහැදිලි කළේය.
විදේශ රටවලද ක්රියාත්මක ක්රමවේදයක්
මෙම ක්රමවේදය දැනටමත් මියන්මාරය, ඉන්දුනීසියාව, පිලිපීනය, චීනය සහ සිංගප්පුරුව වැනි රටවල් සමඟ බටහිර රටවල් කිහිපයකද ක්රියාත්මක වේ.
ඒ හරහා,
- බන්ධනාගාර තදබදය අඩු කර ගැනීම
- රිමාන්ඩ් සිරකරුවන් සඳහා වැයවන රාජ්ය වියදම් අඩු කිරීම
- මානව හිමිකම් ආරක්ෂාව ශක්තිමත් කිරීම
වැනි වාසි ලැබෙන බව සඳහන් වේ.
කෙසේ වෙතත්, මෙම නව පනත ක්රියාත්මක කරන නිශ්චිත කාලසීමාවක් සම්බන්ධයෙන් තවමත් ප්රකාශ කර නොමැත.
