රෝහින්ග්යා මුස්ලිම් සුළු ජාතිය විනාශ කිරීම අරමුණු කරගත් ක්රියාමාර්ග මියන්මාර රජය විසින් ක්රියාත්මක කළ බව ගැම්බියාව එක්සත් ජාතීන්ගේ ඉහළම අධිකරණය වන ජාත්යන්තර අධිකරණය (ICJ) හමුවේ සඳුදා ප්රකාශ කළේය.
හේග් නගරයේ පැවති විභාගයේදී ගැම්බියාව කියා සිටියේ මියන්මාරයේ රාජ්ය ආයතන සහ හමුදා විසින් රෝහින්ග්යා ජනතාවගේ ජීවිත “නරකම සිහිනයක්” බවට පත් කරමින් මිනිස් ඝාතන, ලිංගික ප්රචණ්ඩත්වය, ගම්මාන විනාශ කිරීම සහ බලහත්කාරයෙන් ජනතාව පිටුවහල් කිරීම සිදු කළ බවයි.
වසර දහයකට වැඩි කාලයකින් පසුව ජාත්යන්තර අධිකරණය සම්පූර්ණයෙන් විභාග කරන පළමු ජනනාශ (Genocide) නඩුව මෙය වන අතර, එහි තීන්දුව ගෝලීය මට්ටමින් වැදගත් බලපෑම් ඇති කරනු ඇතැයි නීති විශේෂඥයන් සඳහන් කරයි.
1948 ජනනාශ වැළැක්වීමේ සම්මුතිය උල්ලංඝනය කළ බව පවසමින්, ඉස්ලාම් සහයෝගිතා සංවිධානය (OIC) වෙනුවෙන් ගැම්බියාව මෙම නඩුව ඉදිරිපත් කර ඇත.
මියන්මාර රජය මෙතෙක් සියලු ජනනාශ චෝදනා ප්රතික්ෂේප කරමින්, හමුදා මෙහෙයුම් සන්නද්ධ කණ්ඩායම්වල ප්රහාරවලට ප්රතිචාර ලෙස සිදු කළ බව ප්රකාශ කර තිබේ. කෙසේ වෙතත්, එක්සත් ජාතීන්ගේ විමර්ශන වාර්තා කිහිපයක් මගින් එම ක්රියා “ජනනාශ අරමුණකින් යුක්ත” බව පෙන්වා දී ඇත.
විශ්ලේෂකයන් පෙන්වා දෙන්නේ, මෙම නඩුවේ ප්රතිඵලය ගාසා යුද්ධය සම්බන්ධයෙන් ඊශ්රායලයට එරෙහිව දකුණු අප්රිකාව ඉදිරිපත් කර ඇති නඩුව ඇතුළු අනෙකුත් ජාත්යන්තර නඩු සඳහාද බලපෑමක් ඇති කළ හැකි බවයි.
අවසාන තීන්දුව ලබා ගැනීමට වසර කිහිපයක් ගත විය හැකි වුවද, මෙම විභාගයම ජාත්යන්තර වගකීම් සහ ජනනාශ නීතිය පිළිබඳ ගෝලීය සංවාදය වෙනස් කරමින් පවතින බව නීතිඥයෝ කියා සිටිති.
