නීතිවිරෝධී, වාර්තා නොකළ සහ නියාමනය නොකළ (IUU) මසුන් ඇල්ලීමේ ක්රම භාවිත කරන ලොව විශාලතම අපරාධකරු ලෙස චීනය පත්ව ඇති බව එක්සත් ජනපදයේ ජ්යෙෂ්ඨ නීති සම්පාදකයින් පිරිසක් විසින් නිකුත් කළ විමර්ශන වාර්තාවක සඳහන් වේ.
එම වාර්තාවට අනුව, චීනයේ මෙම ක්රියාකාරකම් ගෝලීය ආහාර ආරක්ෂාවට, සමුද්ර පරිසර පද්ධතිවලට සහ එක්සත් ජනපද ජාතික ආරක්ෂාවට දැඩි තර්ජනයක් එල්ල කර ඇති බව අමෙරිකාව චෝදනා කරයි.
චීනය ලොව විශාලතම දුරස්ථ ජල ධීවර බලඇණිය ක්රියාත්මක කරමින් සිටින අතර, එයට යාත්රා 16,000කට අධික ප්රමාණයක් අයත් වන බවත් එම වාර්තාවේ සඳහන්ය.
මෙම ධීවර බලඇණිය අනෙකුත් රටවල් බිය ගැන්වීම, සමුද්ර සම්පත් අත්පත් කර ගැනීම සහ ගෝලීය මුහුදු ආහාර සැපයුම් දාමයන් මත ආධිපත්යය තහවුරු කර ගැනීම සඳහා භාවිතා කරන බවට ද එක්සත් ජනපදය චෝදනා කර ඇත.
විමර්ශනයට අනුව, චීනයේ දුරස්ථ ජල ධීවර බලඇණිය භූගෝලීය දුරස්ථභාවය මඟහරවා ගනිමින් රාජ්ය විසින් මෙහෙයවන පද්ධතියක් ලෙස ක්රියා කරමින්, ජාත්යන්තර ධීවර මෙහෙයුම් සඳහා බරපතල බාධාවක් බවට පත්ව ඇත.
තවද, බීජිනය විසින් චීන පාලිත මධ්යස්ථාන හරහා ගෝලීය මුහුදු ආහාර සැකසීමේ ක්ෂේත්රය ඒකාධිකාරී කර ඇති බවත්, රාජ්ය සහනාධාර හරහා ස්ථිර පිරිවැය වාසියක් නිර්මාණය කර ඇති බවත් වාර්තාවේ සඳහන් වේ.
ඒ හරහා චීන පාලිත සැපයුම් දාමයන් මත එක්සත් ජනපදයේ යැපීම වැඩි වන අතර, අමෙරිකානු මුහුදු ආහාර සැකසුම් ධාරිතාව අඩපණ කිරීමට සහ ගෝලීය වෙළඳපොළවල් හසුරුවා ගැනීමට චීනය කටයුතු කරමින් සිටින බවද එම වාර්තාවෙන් පෙන්වා දෙයි.
