ත්රිකුණාමලයේ පිහිටි ශ්රී සම්බුද්ධ ජයන්ති බෝධිරාජ විහාරය සම්බන්ධයෙන් මතුවූ අනවසර ඉදිකිරීම් ආන්දෝලනය පිළිබඳව අද (පෙබරවාරි 20) අභියාචනාධිකරණය වැදගත් තීන්දුවක් ප්රකාශ කළේය.
වෙරළ සංරක්ෂණ දෙපාර්තමේන්තුව විසින් විහාරස්ථානයේ කොටසක් කඩා ඉවත් කරන ලෙස නිකුත් කර තිබූ නියෝගය අත්හිටුවන ලෙස ඉල්ලා එහි විහාරාධිපති පූජ්ය කල්යාණ වංශ තිස්ස හිමි ගොනුකර තිබූ රිට් පෙත්සම සලකා බැලූ අවස්ථාවේදී මෙම තීන්දුව ප්රකාශයට පත් විය.
“අනුමත සැලැස්මට අනුකූලව කටයුතු කළ යුතුයි”
මෙම නඩුව ධම්මික ගනේපොල සහ ආදිත්ය පටබැඳිගේ යන විනිසුරුවන්ගෙන් සමන්විත විනිසුරු මඩුල්ල ඉදිරියේ කැඳවනු ලැබිණි.
පෙත්සම්කාර පාර්ශ්වය වෙනුවෙන් පෙනී සිටි ජනාධිපති නීතිඥ සුසන්ත බාලපටබැඳි අධිකරණයට දැනුම් දුන්නේ, විවාදයට ලක්වූ ඉදිකිරීම් කොටස අනුමත සැලැස්මට අනුකූලව සංශෝධනය කිරීමට විහාරාධිපති හිමියන් එකඟතාවය පළ කර ඇති බවයි.
ඒ අනුව, පෙර නඩු දිනයේදී වෙරළ සංරක්ෂණ දෙපාර්තමේන්තුවද එම එකඟතාවය සැලකිල්ලට ගනිමින් කඩා ඉවත් කිරීමේ නියෝගය තාවකාලිකව ඉවත් කර ගැනීමට එකඟ වූ බවත් දැනුම් දුන්නාය.
කෙසේ වෙතත්, විහාරාධිපති හිමියන් වෙනත් නඩුවකට අදාළව රිමාන්ඩ් භාරයට පත්වීම හේතුවෙන් එම කටයුතු ප්රමාද වී ඇති බවද අධිකරණයට පෙන්වා දෙන ලදී.
අප්රේල් 28 දක්වා කල්
වගඋත්තරකරුවන් වෙනුවෙන් පෙනී සිටි නියෝජ්ය සොලිසිටර් ජනරාල් මනෝහර ජයසිංහ එම ඉල්ලීමට විරෝධය පළ කළේ නොමැත.
අදාළ ඉදිකිරීම්වල වෙනස්කම් සිදු කරන්නේ නම්, ඒවා අනිවාර්යයෙන්ම අනුමත සැලැස්මට අනුකූලව සිදු කළ යුතු බව විනිසුරු මඩුල්ල අවධාරණය කළේය.
ඒ අනුව, අදාළ කටයුතු සම්පූර්ණ කිරීමට පෙත්සම්කාර පාර්ශ්වයට 2026 අප්රේල් 28 වන දින දක්වා කල් ලබා දීමට අධිකරණය තීරණය කළේය.
එදින එම කටයුතු පිළිබඳ ප්රගතිය අධිකරණයට වාර්තා කිරීමටද නියෝග කර ඇත.
